Nýir starfsmenn hjá Reiknistofnun
Douglas Brotchie
Eins og sagt var frá í síðasta hefti Fréttabréfsins stóðu yfir nokkrar
breytingar á starfsliði stofnunarinnar í kringum síðustu áramót.
Chabane Ramdani hóf störf hjá stofnuninni 1. desember. Hann kemur til
okkar með óvenju fjölbreytta menntun og víðfengna reynslu. Hann hóf
háskólamenntun sína í Tizi Ouzou í Alsír og þaðan fór hann til
University of Nottingham. Hann vann að doktorsrannsóknarverkefni í
tölvunarfræði við háskólann í Aberystwyth í Wales og vann svo í fimm
ár á Hvanneyri, fyrst við hagþjónustu landbúnaðarins og seinna meir
bættist við starf fyrir bændaskólann á staðnum.
Helgi Hálfdánarson kom til Reiknistofnunar frá Landmælingum Íslands.
Hann var reyndar búinn að vera hér viðloðandi fyrir áramótin, en
byrjaði fyrst í fullu starfi hjá okkur 1. janúar. Hann hefur tekið
við af Einari Indriða-syni og sér um kerfisstjórn og kerfisskipulag,
aðallega fyrir verkfræðideild. Helgi er verkfræðingur að mennt en
eftir að háskólamenntun lauk hefur hann öðlast fjölbreytta reynslu á
sviði hugbúnaðargerðar, tölvu- og netrekstrar auk umsjónar og
skipulagningar.
Kristján Þór Kristjánsson er B.Ed. frá Kennaraháskólanum. Að náminu
loknu og eftir hálft annað ár við eðlisfræðikennslu í Vestmannaeyjum
ákvað hann að snúa við blaðinu og fór út til Árósa í nám í
kerfisfræði. Þegar náminu var lokið lá leiðin beint til
Reiknistofnunar. Kristján Þór og Chabane koma til með að starfa við
kerfisgreiningu og kerfisgerð fyrir stjórnsýslu skólans, við frekari
þróunarvinnu í kringum UKSHÍ (UpplýsingaKerfi Stjórnsýslu Háskóla
Íslands). Framundan er vinna við ýmsar þýðingarmiklar nýjungar í því
kerfi.
Bæði Chabane og Kristján Þór stunda íþróttir ýmsar af miklu kappi með
áherslu á knattspyrnu. Því má gera ráð fyrir að knattspyrnuiðkun hjá
starfsmönnum stofnunarinnar taki mikinn kipp í kjölfar þessara nýju
ráðninga og fótboltalið stofnunarinnar kemur vafalítið til með að marka
spor í íþróttalífi borgarinnar þegar fram líða stundir.
Starfsmennirnir voru að vísu ekki ráðnir með þetta í huga en ekki
sakar það.
|