nr. 29 apríl 1996

Aukin notkun háskólanets og þjónustu RHÍ

Richard Allen
Guðmundur Bjarni Jósepsson

Í fyrra birtust í fréttabréfinu upplýsingar um notkun tölvupósts, WWW, Gophers og fleira. Við tókum saman sömu upplýsingar ári seinna, bæði til gagns og gamans.

Notkun á öllum búnaði og þjónustu sem Reiknistofnun veitir hefur aukist umtalsvert og má rekja það að einhverju leyti til aukins áhuga á Internetinu og veraldarvefnum. Hefur notendum milli ára fjölgað úr tæplega 4200 í 5500.

Mest áberandi er samt aukningin í notkun veraldarvefsins. Notkun á honum í háskólanum jókst um rúmlega 600% frá nóvember 1994 fram í nóvember 1995! Hefur Reiknistofnun þurft að gera breytingar á búnaði sínum oftar en einu sinni til að anna þessari auknu notkun og frekari breytingar eru fyrirhugaðar.

Eftirspurn eftir Gopher þjónustu minnkar talsvert en það kemur að sjálfsögðu til vegna aukins framboðs á efni á veraldarvefnum.

Það er athyglisvert að skoða gröfin neðst á síðunni. Þar sést að notkun á Kröflu er mun minni en á Hengli þrátt fyrir að hún sé talsvert öflugri tölva. Sennilega stafar það af því að notendur eru vanir að nota Hengil og vinna flestra er þess eðlis að þeir þurfa ekki aukið vélarafl, t.d. lestur tölvupósts og frétta.

Notkun á Heklu er orðin hverfandi lítil enda hefur hún nú tekið við hlutverki proxy þjóns.

Taflan hér að neðan sýnir tölur frá því í nóvember 1994 og nóvember 1995 auk hlutfallslegrar aukningar milli ára.