|
Sæþór L. Jónsson
Endurbætur í tölvuverum
Í sumar hafa verið gerðar róttækar endurbætur á tölvuverum Reiknistofnunar.
Tölvukostur hefur verið endurnýjaður, eða fluttur til og lagnir endurnýjaðar. Þá
hefur sá háttur verið tekin upp að tölvur í tölvuverum ræsa sig af netþjóni
þannig að fræðilega séð gætu vélarnar verið disklausar. Þetta er þó ekki gert,
þar sem æskilegt er að Windows stýrikerfið sé til staðar á vélinni.
Nýtt tölvuver var sett upp í VR-II og var það fyrirmynd að þeim endurbótum sem
gerðar voru í tölvuverunum. Tölvurnar eru allar tengdar með snúnum vír (Twisted
Pair) beint við miðeiningu (Hub) og mynda stjörnulaga net í stað þess að vera
tengdar í seríu með miðása vír (Coax). Þetta gerir vélarnar óháðari hverri
annari, þannig að þó ein bili hefur hún ekki áhrif á aðrar vélar. Þegar
vélarnar voru tengdar í seríu þurftu aðeins ein samskeyti, eða eitt netkort að bila
til þess að allt tölvuverið varð sambandslaust við netþjón og vélarnar
„frusu“.
Þá er nú á haustdögum verið að ganga frá tölvustofum fyrir Námsbraut í
hjúkrunarfræði í Eirbergi og fyrir Námsbraut í sjúkraþjálfun að Vitastíg 8, en
þangað voru fluttar tölvur sem áður höfðu verið í Árnagarði. Á næstu vikum
verður skipulagt nýtt tölvuver Reiknistofnunar í Lögbergi.
Tölvuver RHÍ í VR-II
Tölvuverið í húsnæði Verkfræði- og Raunvísindastofnunar, VR-II sem er á annari
hæð í stofu 256 er búið 10 Hyundai 90 MHz Pentium tölvum með 16 MB innra minni og
17” skjám. Hönnuð voru sérstök tölvuborð fyrir verið sem fela allar lagnir og
voru þau smíðuð af innlendri smíðastofu. Þá voru lagnir lagðar eftir fölsku
lofti stofunnar og faldar í lagnastaurum. Netþjónninn Eldhaf er staðsettur inni í
stofunni og myndar þar vinnuhóp. Fyrirhugað er að setja upp 100 Mbit/s ethernet í
tölvuverið, en það hefur tafist nokkuð vegna skorts á hugbúnaði til að setja upp
svokallað BootProm fyrir netkortin, en það mál er nú leyst.
Tölvuver RHÍ í eystri stofu Vetrarhallar
Tölvur í eystri stofu Vetrarhallar voru endurnýjaðar með 12 Hyundai 90 MHz Pentium
tölvum með 16 MB innra minni og 15” skjám. Tölvuborðin voru endurnýjuð með
svipuðum borðum og í VR-II. Lögnum var breytt í snúinn vír og tölvurnar
stjörnutengdar. Netþjóninn Eldey þjónar báðum tölvuverum RHÍ í Vetrarhöll.
Tölvuver RHÍ í vestari stofu Vetrarhallar
Tölvur í vestari stofu Vetrarhallar eru af gerðinni HP Vectra 486 DX með 8 MB innra
vinnsluminni og 17” skjám. Tölvuborðin voru endurnýjuð með samskonar borðum og
í eystri stofunni. Lögnum var breytt í snúinn vír og tölvurnar stjörnutengdar.
Tölvuver RHÍ í Odda stofu 103
Tölvur í Odda 103 voru endurnýjaðar með 10 Hyundai 90 MHz Pentium tölvum með 16 MB
innra minni og 15” skjám. Tölvuborðin voru endurnýjuð með svipuðum borðum og
í Vetrarhöll, nema í stað beykispóns var valin Oregon fura í samræmi við þann
við sem er ráðandi í byggingunni. Sett var upp miðeining undir prentaraborðið og
lagnir faldar í leiðslustokkum undir borðunum. Lögnum var breytt í snúinn vír og
tölvurnar stjörnutengdar. Netþjóninn Eldfell þjónar báðum tölvuverum RHÍ í
Odda.
Tölvuver RHÍ í Odda stofu 102
Tölvur í Odda-102 voru endurnýjaðar með 18 HP Vectra 75 MHz Pentium tölvum með 16
MB innra minni og 15” skjám. Tölvuborð hafa verið hönnuð af arkitekt hússins
og eru þau nú í smíði. Borðaraðir verða tvær, bogalaga og borðin tengd saman.
Þar sem lagnaleiðir eru mjög takmarkaðar í Odda verða miðeiningar staðsettar undir
hvorri borðaröð og lagnir faldar í leiðslustokkum undir borðunum. Lagt verður með
snúnum vír og tölvurnar stjörnutengdar.
Tölvuver RHÍ í Árnagarði
Tölvur í Árnagarði voru endurnýjaðar með 18 Hyundai Super-386SE 16 MHz tölvum með
4 MB innra minni og 14” skjám. Notuð voru gömlu tölvuborðin og tölvurnar
tengdar áfram með miðása kapli í seríu. Netþjóninn Eldvatn þjónar tölvuveri
RHÍ í Árnagarði.
Tölvustofa RHÍ í Eirbergi
6 IBM PS/2-70 16 MHz 386DX tölvur úr Árnagarði og 6 Hyundai Super-386SE 16 MHz úr
Odda, hvort tveggja með 4 MB innra minni og 14” skjám voru settar upp í
tölvustofu í Eirbergi. Tölvuborð sem verið höfðu í Vetrarhöll fylgdu með.
Tölvurnar eru nettengdar með sameiginlegan útprentunarmöguleika í huga.
Tölvustofa RHÍ á Vitastíg 8
8 IBM PS/2-70 16 Mhz tölvur með 4 MB innra minni og 14” skjám voru fluttar úr
Odda og settar upp í tölvustofu á Vitastíg 8. Tölvuborð sem verið höfðu í
Vetrarhöll fylgdu með. Tölvurnar eru nettengdar með sameiginlegan
útprentunarmöguleika í huga.
|