Guðmundur Bjarni Jósepsson

Ný mótöld hjá Reiknistofnun

Reiknistofnun hefur nú sett upp ný háhraðamótöld til að sinna innhringiþjónustu.

Mótöldin eru af gerðinni ZyXEL Elite 2864 og eru 12 talsins. Verður þeim væntanlega fjölgað í 16 þegar nýr skjáþjónn verður keyptur.

Hraði mótaldanna er allt að 28.800 bps en þau tengjast mótöldum allt niður í 9600 bps. Eins og með 14.400 bps mótöldin er villuleiðrétting og þjöppun samkvæmt MNP4/5 stöðlum. Skjáþjónninn sem mótöldin eru tengd við er þannig uppsettur að hann slítur sambandið ef engin umferð hefur borist frá mótaldinu í 30 mínútur.

Símanúmerið fyrir nýju mótöldin er 525 4220.

Athugun á notkun
Í nóvember gerði Reiknistofnun könnun á notkun innhringimótalda. Tengdur var búnaður við símstöð háskólans sem skráði allar upplýsingar um hringingar í 525 4748 og 525 4050 sem eru símanúmer fyrir lághraðamótöld Reiknistofnunar og eldri hárhraðamótöld.

Verið er að vinna úr upplýsingunum sem komu úr þessari könnun og verða niðurstöðurnar væntanlega birtar í fréttabréfinu og/eða á netinu.