nr. 25 apríl 1995

Sigfús Magnússon

TIA á Hengli

Í gegnum árin hefur Reiknistofnun (RHÍ) boðið notendum sínum upp á upphringisamband við fjölnotendavélar sínar.

Upphringisamband er samband þar sem notandi getur, með hjálp tölvu sinnar, mótalds og venjulegrar símalínu heima hjá sér, komist í samband við fjölnotendatölvur Reiknistofnunar og unnið þar margvísleg störf, til dæmis notað tölvupóst, lesið fréttir og fleira (sjá grein „Nettengdur og hvað svo").

Aðgangur á textaformi
Hingað til hefur þessi tenging einungis verið á textaformi, þannig að það eina sem notandinn fær á skjáinn hjá sér eru stafir - engin grafík. Þetta hefur komið í veg fyrir frekari útbreiðslu upphringisambandsins, þar sem margir notendur hafa hvorki kunnáttu né áhuga á að nota Unix stýrikerfi fjölnotendatölva Reiknistofnunar.

Þrátt fyrir að notendur hafi komist inn á Internetið með þessu móti hafa tölvur þeirra ekki tengst Internetinu beint, heldur hafa þær virkað sem útstöð á fjölnotendatölvum Reiknistofnunar, sem svo aftur eru tengdar Internet. Til að ná fullum Internet aðgangi frá tölvu notanda verður hún að geta tengst með svokallaðri IP tengingu við Internet.

Myndrænn aðgangur
Með nýjum búnaði, sem kallast The Internet Adapter (TIA), sem RHÍ hefur fest kaup á, er notandanum gert kleift að hafa fullan myndrænan Internet aðgang heiman frá sér.

Með notkun búnaðarins getur notandinn notað hin ýmsu forrit til að nota netið, svo sem Eudora, til að lesa tölvupóst, NewsWatcher, til fréttalesturs og Netscape, til WWW skoðunar (sjá grein „Heimasíður á Veraldarvíðsvefnum).

TIA er uppsett á Hengli og geta átta notendur notað búnaðinn samtímis. Átta leyfi til viðbótar verða svo sett upp á nýja fjölnotendatölvu sem Reiknistofnun hyggst festa kaup á.

Til að nota TIA þarf notandi að setja upp á tölvu heima hjá sér svokallaðan SLIP búnað og annan endahugbúnað. Allan þann búnað getur notandi fengið hjá Reiknistofnun. Það eina sem notandinn þarf til að tengjast Internet heiman frá sér er þá tölva, frekar hraðvirkt mótald (mælt með 14.400 bás) og svo venjuleg símalína.

Frekari upplýsingar er að finna á WWW með slóðinni /HI/Stofnanir/RHI/Mac/tia.html og hjá Sigfúsi og Guðmundi.