Hvers vegna Windows95?

Ný útgáfa af Windows hefur verið í smíðum hjá Microsoft í nokkurn tíma. Nýjustu fregnir herma að nýja útgáfan muni koma út næsta vor og muni heita Windows95. Um daginn rakst ég á lista yfir það hvað fólk telur að 95 standi fyrir í nafni forritsins og læt ég hann flakka hér.

• Prósentuhlutfall stýrikerfisins sem verður tilbúið á útgáfudegi
• Fjöldi disklinga sem það kemur á
• Prósentuhlutfall notenda sem þarf nýjan vélbúnað til að geta keyrt Windows95
• Megabæti sem það tekur á diski
• Fjöldi blaðsíðna í "easy-install" hluta handbókarinnar
• Prósentuhlutfall Windows forrita sem til eru sem munu ekki keyra undir stýrikerfinu
• Mínútur sem tekur að setja það inn
• Fjöldi símhringinga til tæknimanns áður en þér tekst að fá það í gang
• Fjöldi þeirra sem munu borga fyrir uppfærslu úr eldri útgáfum af Windows
• Fjöldi megariða sem þarf til að keyra það